‘Munti Boys’ maoy nagpaluyo sa midwife ug kapuyo

CEBU, Philippines - Gibutyag sa hepe sa Provincial Intelligence Branch sa Cebu Provincial Police Office Supt. Rodolfo Albotra nga mga “Munti Boys” ang nagpaluyo sa nadakpang managkapuyo nga nakuhaa’g mga armas ug shabu sa Danao sa miaging adlaw.

Matud pa ni Albotra nga ang nagpaluyo ni Rogelio Capuno ug ni Gloria Saturos nga nasikop sa Danao sa illegal nga drugas gikan sa New Bilibid Prison sa Muntinlupa City.

Apan gitataw ni Albotra nga wala kini magpasabot nga ang supply sa duha gikan sa sulod sa maong prisohan kondili mga priso didto ang nagpadagan niini. Matud niya nga ang operasyon sa duha tibook probinsya sa Sugbo.

Si Albotra miingon nga dunay mga kaliwat si Saturos nga nalambigit usab sa illegal nga drugas ug nagtingkagol na sa prisohan.

Samtang si Capuno daan nang naa sa watchlist sa PIIB nga gisuspetsahan nga usa ka pusher ug manghimoay og armas.

Ang mga loose firearms nga ginama sa Danao maoy gidudahan sa kapolisan nganong misaka ang mga krimen nga naglambigit sa mga pagpamusil.

Gawas sa drugas ug mga armas ug mga parte niini, nakuha usab sa kapolisan ang mga ekipo paghimo niini.  (BANAT NEWS)