Presyo sa bugas humay mokunhod sa Marso

CEBU, Philippines - Gipahibawo sa National Food Authority (NFA) nga sa tungatunga sa bulan sa Marso gipaabot nga mokunhod ang presyo sa bugas humay tungod sa ting-ani sa sunod bulan.

Sigon pa sa tigpamaba sa NFA-7 nga si Ma. Lucia Rosales nga tunga-tungang bulan sa Marso gipaabot nga mokunhod ang presyo sa bugas humay.

 Hinuon gipaabot nga dili kaayo daghan ang maani dinhi sa Kabisay-an tungod sa kalamidad nga niigo niadtong nakalabay nga tuig.

Magnihit pag-usab ang supply sa bugas sa bulan sa Hulyo nga panahon na usab sa tingtanom.

Apan iyang gipasalig nga gipangandaman na nila kini tungod kay may daghang stocks sa imported rice ang NFA nga gitagana alang sa mga bulan nga dili ting-ani sa humay dinhi sa nasud.

 Samtang gibutyag ni Rosales nga wa sila maapektohi sa alegasyon ni Bayan Muna Representative Neri Colmenares bahin sa overpricing sa gi-import nga bugas gikan sa Vietnam.

Matud pa ni Rosales nga wa silay kalambigitan sa proseso sa pagtugot sa gidaghanon sa rice importation sa nasud kay ang ilaha mao ra ang pag-stock niini sa ilang mga bodega.

Sumala pang Rosales nga ang NFA Council nga gilangkoban sa mga representante sa  ubang national government agencies maoy nagbuot sa gidaghanon sa i-import nga bugas.

Ang mga bugas nga gi-import ug gisud sa mga bodega sa NFA-7 gitagana para lang sa Central Visayas.

Si Colmenares miingon nga gi-overprice ang 1.4 bilyones pesos nga rice importation sa NFA gikan sa Vietnam ug nanawagan kini og imbestigasyon.  (BANAT NEWS)