70 ka manguykoyay sa Tapul landfill apektado sa pagkasunog sa basurahan

CEBU, Philippines - Nabalaka karon ang 70 ka mga manguykoyay og basura sa landfill sa barangay Tapul, Talisay City tungod niining pagsilaob sa mga basura ug naglisod na sila pagpanguha og mabaligya pang basura.

Si Kapitan Mary Ann Nolasco nga nahinabi sa Banat News kagahapon mibutyag nga hapit nang mapuno ang duha ka pond sa landfill ug tungod sa kadaghan na sa nadugta nga basura gidudahang duna nay deposito sa methane gas.

Niadtong milabay’ng Sabado sa kaadlawon kalit nga misilaob ang ikaduhang pond, ang mga manguykoyay dili na makapaduol tungod sa kainit ug baga kaayong aso.

Si Nolasco nangayo  na lang og tabang ngadto sa City Social Welfare sa siyudad. Ang mga apektadong scavengers gihatagan na og bugas ug sardinas  apan nangutana kung hangtud kanus-a sila makabalik sa pagpanguykoy og basura aron di magsalig sa siyudad.

Nabalaka usab si Nolasco sa ilang mga panglawas sanglit ang baho sa methane gas nga mauban sa hangin ilaha nang mahanggap.

Si Konsehal Antonio Bacaltos, Jr., chairman sa committee on environment sa konseho sa Talisay nga nahinabi sa Banat News nagkanayon kini nga pabantayan og bombero ang lugar aron mabombahan kini og tubig kun init ang panahon.

Gikatakdang magtigom ang Solid Waste Management Office kabahin sa problema ug iyang komitiba aron  ilang tukion ang problema. (BANAT NEWS)