Mga militante wa kaporma, pan ni Romana gibalibaran

CEBU, Philippines - Malinawon kaayo ang kasaulogan sa EDSA People Power 1 sa dakbayan sa Sugbo bisan pa og adunay nagpahigayon og rali sa Fuente Osmeña. Ang hepe sa Cebu City Police Office (CCPO) nga si Senior Superintendent Noli Romana miduol sa mga raliyista, dayon mitunol og pan kanila apan wala panumbalinga sa mga raliyista.

Si Supt. Renato Malazarte, ang Deputy Provincial Director for Operation, nga maoy gitahasan sa seguridad sa Capitol Compound miingon nga malinawon ug way kasamok nga nahitabo.

Matud ni Malazarte nga gihangop sa katawhan ang maong kalihokan ilabi na nga kini maoy labing una nga higayon nga gisaulog ang EDSA People Power Revolution gawas sa EDSA ug gipahigayon dinhi sa Sugbo.

Dunay maihap lang nga mga raliyista ang nagmartsa diha sa Fuente Osmeña Circle apan matud sa kapolisan malinawon ra ang maong kalihokan ug dali ra usab kaayo silang namauli.

Si Romana misuway unta paghatag og mga pan sa mga raliyista apan walay bisan usa kanila nga midawat.

Nasayran usab nga daghang mga bata nga nag-edad og 10-anyos paubos ang nikuyog sa mga militante bisan gidili kini sa balaod.

Ang kapolisan daan nang nag-andam og Civil Disturbance Management (CDM) personnel apan ang pagkamalinawon sa mga Sugbuanon naghimo sa CDM nga walay gamit kagahapon.

Wala say nadawat nga alarma ang kapolisan nga may labot sa maong kalihokan.  (BANAT NEWS)