2 tulisan nadakpan
CEBU, Philippines - Duha ka 18-anyos nga gipasanginlang nanulis og usa ka jeep pasaheroan ang nadakpan sa kapolisan niadtong Biyernes sa hapon sa managlahing lugar.
Nasikop nila ni PO3 Diosdado Parejas uban sa usa ka sakop sa Barangay Intelligence Network Restituto Rodriguez sa Police Station 4 si Juniel Lachica Quimco nga taga Nivel Hills, Lahug ning dakbayan human niini gitulis ang usa ka 14-anyos nga biktima diha sa San Jercasvil, Lahug.
Matud pa sa biktima gitiunan siya sa suspek og kutsilyo ug gilabni ang iyang kwintas, dali hinuon siyang midangop sa kapolisan ug pinaagi sa rogues gallery nailhan kini ug natultolan ang iyang balay ug nabawi ang kwintas ug nakuha ang kutsilyo nga gigamit niini sa krimen.
Nadakpan usab ang usa ka John Philip Bentuhan Lagartija nga taga sitio Bato, Ermita sa duha ka barangay tanod diha sa eskina Magallanes, Barangay Ermita human niini gitulis ang usa ka Gabriel Jadraque Jr.,78, nga taga Oprra Village, Kalunasan.
Nabawi kaniya ang kwintas nga nagkantidad og P30,000 , usa ka walo ka pulgadas nga kutsilyo ingon man usa ka stick nga marijuana sa bulsa niini. (Angelica Bertos, NSU Intern/EIM) (BANAT NEWS)
- Latest
