Talisay magtukod og dakung tangke sa tubig

CEBU, Philippines - Ang kagamhanan sa dakbayan sa Talisay nagplano nga magpatukod og water reservoir dapit sa Sitio Campensa nga sakop sa Barangay Manipis aron kapundohan og tubig nga magamit sa pagpamubo sa mga tanom sa mag-uuma.

Nahuna-hunaan ni Mayor Johnny De los Reyes ang pagtukod og dakong tangke sa tubig dihang mibisita siya sa maong lugar ug iyang nakita ang tubig nga nag-agas lang gikan sa tinubdan nga wala kapahimusli.

Matud sa mayor nga aron dili mausik ang tubig angayang butangan og reservoir ang lugar nga mapundohan sa tubig.

Nagplano usab si Mayor JVR nga panindoton pa niya ang karsada paingon sa mao nga dapit aron masayon na unya ang paghatod sa mga mag-uuma sa ilang mga produkto ngadto sa merkado.

Bisan ang mga reporters nga nakabisita sa mao nga lugar nakabantay sab sa kabati ug sa kabatoon nga karsada nga delikado kaayo nga modahili panahon sa ting-uwan.

Ang masakyan sa mga molupyo sa mao nga lugar aron makalugsong sa dakbayan sa Talisay mao ra g’yud ang motorsiklo  nga gitawag og “habal-habal.” Si Mayor JVR hinoon mipaayo na pagsugod sa gubaon nga karsada.

Matud ni Talisay City public information officer Vincie Monterde nga ang mayor nagplano usab sa pagpa-aspalto sa karsada.

Samtang daghan sa mga lumulopyo sa Barangay Camp 4, Talisay nga walay pansayan sa ilang panimalay ug mao nga gipabuhatan sila sa mayor og duha ka communal toilet.

Kaniadto ang ubang molupyo sa Campo 4 nakasinati og suka-kalibang tungod sa hugaw nga tubig nga ilang nainom gikan sa ilang tinubdan nga dunay kagaw sa hugaw sa tawo ug mananap.  (BANAT NEWS)