Swiss mikulata sa kapuyo gipadakop

CEBU, Philippines - Gidakop sa kapolisan ang usa ka langyaw nga gireklamo sa iyang kapuyo nga midagmal kaniya pasado alas- 3 sa miaging hapon didto sa lungsod sa Dumanjug. Ang nasikop naila nga si Michel Jenzer, 48, Swiss national, kasamtangan nga nagpuyo sa lungsod sa Dumanjug. Gireklamo siya sa 23-anyos niyang kapuyo didto sa buhatan sa kapolisan tungod sa giingong pagpangulata sa maong langyaw.

Ang biktima dunay mga bun-og sa iyang kamot dihang mitaho siya sa kapolisan. Sumala sa biktima nahitabo ang pagpangulata niadtong Biyernes sulod sa ilang giabangan nga kwarto sa San Remigio Cultural Center.

Naabtan sa kapolisan nga didto sa kiosko naglingkod ang suspetsado ug gisikop gilayon kini.  Kasong kalapasan sa RA 9262 o Violence  Against Women and their Children ang atubangon sa maong langyaw.  (BANAT NEWS)