Nakabangga sa abogada gikiha na
CEBU, Philippines - Gipasakaan kagahapong adlawa og kasong reckless imprudence resulting in homicide ang call center agent nga giingong nakaligis patay sa usa ka abogada niadtong Miyerkules sa dalan Escario sa barangay Capitol Site ning dakbayan sa Sugbu.
Si Junette July Yamyamin, 24, nga taga Sitio Baka, Barangay Apas, Cebu City gipaubos sa inquest proceedings diha sa Cebu City Prosecutor’s Office diin kini mipadayag kang State Prosecutor Gandhi Truya nga i-file na diretso ang kaso sa korte ug didto na lang niya kini atubangon.
Tungod niini, gisang-at ni Truya ang kaso sa korte, si Yamyamin nakabutang og piyansa nga P30,000 alang sa iyang temporaryong kagawasan ug gipirmahan ni Judge Oscar Andrino sa Municipal Trial Court in Cities (MTCC) ang iyang release order.
Si Yamyamin maoy gitumbok nga nakadasmag patay kang Atty. Norma Garciano, 73, niadtong Miyerkules sa alas 6 sa buntag samtang padung ang biktima mosimba.
Samtang gipasaka na ang kasong frustrated murder ug attempted murder batok sa anak sa usa ka pulis diha sa korte may kalambigitan sa pagpamusil atol sa usa ka bayle sa barangay Ermita, Cebu City niadtong Valentine’s Day.
Si Fiscal Maria Theresa Casiño sa Cebu City Prosecutor’s Office mirekomendar nga ipasaka ang kaso sa korte human mi- waived sa iyang katungod ang 17-anyos nga suspek nga mopaubos og imbestigasyon sa ilang buhatan.
Si Casiño mirekomendar og P40,000 nga piyansa sa kasong frustrated murder ug laing P24,000 para sa kasong attempted murder alang sa iyang temporaryong kagawasan.
Ang akusado positibong gitumbok sa mga testigos nga maoy mipusil sa usa ka 17 anyos ug ni Johannie Celerio, 20. Ang amahan sa suspek nga usa ka polis maoy mitahan sa anak diha sa Carbon Police Station niana nang pagkabuntag. (/EIM)(BANAT NEWS)
- Latest
