Kusinero sa batchoyan gipusil patay

CEBU, Philippines - Usa ka kusinero ang patay human kini gipusil samtang nagpadung na pauli sa ila  diha sa bag-ong jeepney terminal sa Brgy. Poblacion dakbayan sa Lapu-Lapu kagahapon sa kaadlawon.

Ang biktima mao si Esmael Gayo, 36, residente sa maong dapit usa ka kusinero sa Carlos Batchoy sa dakbayan sa Lapu-Lapu.

Matud pa ni PO2 Lydo Pinos  sa Homicide Section sa Lapu-Lapu City Police Office, gikan sa trabahoan ang biktima ug naglakaw pauli dihang giduol kini sa wa mailhing lalaki ug gidiretso kini sa pagpusil sa dughan.

Patay diha-diha si Gayo samtang daling miikyas ang mamumuno niini. Nakuha diha sa crime scene ang tulo ka basiyo sa kalibre 45 nga bala nga gidudahang gikan sa armas sa mamumuno.

Personal grudge maoy gitutukan karong anggulo sa pagpatay sa biktima tungod kay wala hilabti sa mamumuno ang iyang pitaka ug personal nga mga gamit.

Sa laing insidente sa pagpamusil, usa ka mag-uuma ang gipusil samtang nagdaro sa iyang gitikad nga uma diha sa barangay Nangka, dakbayan sa Danao sa miaging adlaw.

Ang biktima mao si Rueland Landero, 24, nagpuyo sa maong dapit ug ang nagpusil mao ang duha ka wala hiilhing mga lalaki nga daling nangikyas human sa krimen.

Si PO3 Roselo Campo sa kapolisan sa maong dakbayan nga wala makabantay ang biktima sa pagduol sa mga mamumuno nga kalit mipusil sa iyang nawong.

Daling nangikyas ang mga namusil ug gibiyaan ang biktima. Si Landero gidala sa Vicente Sotto Memorial Medical Center ug gikatakdang operahan aron lugiton ang bala nga miungot sa iyang aping. (BANAT NEWS)