Lending collector nasampak sa bus patay
CEBU, Philippines - Usa ka lending collector ang namatay human kini nadasmag sa usa ka bus pasaheroan samtang sakay sa motorsiklo niini diha sa national highway sa Barangay Liloan, Santander sa miaging hapon.
Si Gilbert Bugay, 23, taga Dumaguete City, Negros Oriental ug lending collector sa Sunrise Lending Company, sakay sa iyang Honda XRM motorcycle nga adunay plakang 7402GS sa dihang misampak kini sa luyo sa Ceres bus nga maoy hinungdan sa pagkaangkon ni Bugay og samad sa kalawasan ug namatay diha dayon.
Matud pa nga nagsunod sa bus nga gimaneho ni Malbin Romano, 47, taga Tungkil, Minglanilla gikan sa Samboan paingon sa Barangay Liloan, Santander.
Sa imbestigasyon sa kapulisan nga nag-signal na ang bus aron moliko sa walang bahin apan wala makabantay si Bugay ug nadasmag sa bus.
Base ni SPO4 Isagani Tinapay, kinsa usa sa mga miresponde sa hitabo nga kusog ang dagan ni Bugay maong wala kini maka-brake dayun.
Mitahan hinuon sa kapulisan si Romano ug gitanggong karon sa Santander Police Station samtang gipaabot pa ang pamilya ni Bugay alang sa pagpasaka og kasong reckless imprudence resulting to homicide. (BANAT NEWS)
- Latest
