IBP-Cebu city chapter nalipay nga pasado sa sc ang online libel

CEBU, Philippines - Presidente sa Integrated Bar of the Philippines-Cebu City Chapter Mae Elaine Bathan nalipay sa deklarasyon sa Korte Suprema nga way nasupak sa Konstitusyon ang Republic Act No. 10175 o ang Cybercrime Prevention Act  o ang kontrobersyal nga Online Libel.

Matud ni Bathan nga bisan gipaniguro sa Konstitusyon ang kagawasan sa pagpadayag kinahanglan gihapon kini nga may limitasyon.

Sumala pa niya ang pag- exercise sa freedom of expression sa internet karon gipalabian na sa ubang online users ug giabusohan na og maayo.

Kahinumduman nga bag-ohay lang gideklarar sa Korte Suprema nga constitutional ang balaod nga nagtinguhang pasilotan ang mga nasuwat og mga libelous statements sa social networking sites.

Apan dili mahimong apilon sa pasilotan ang mga online users nga igo rang ni-comment sa mga isyung ipang-post sumala pa sa desisyon.

Apan matud pa ni Bathan nga kinahanglan nga tan-awon gyud unta kini og maayo sa Korte Suprema tungod kay dunay mokomento nga may nagpaluyong malisya ug dunay intensyon nga dauton ang gikomentaryohan.

Ug tungod niana, susama na og nagkumboya ang nagsuwat sa libelous nga mga gi-post sa internet. (BANAT NEWS)