Polis nga nakapatay imbestigahon sa PIDMB

CEBU, Philippines - Ang Provincial Investigation and Detective Management Branch mo-imbestigar sa kaso ni PO1 Sofialin Pableo, kinsa mipusil patay sa usa ka armadong tawo niadtong Domingo sa kaadlawon didto sa Sitio Calumpang, Barangay Poblacion West, Moalboal, alang sa iyang administrative liability.

Si Chief Insp. Timmar Alam, deputy chief sa PIDMB, mibutyag nga magpaabot pa sila sa investigation report sa Moalboal Police Station.            "We will wait for the investigation report of the police station and if we are not satisfy of their explanation then we will come in to check if PO1 Pableo has grounds for administrative case or not," matud ni Alam.

Ang pamilya sa biktima nga si Delgado Sab-a, 31, taga Barangay Poblacion East, wala pa mopatim-aw sa buhatan sa kapulisan aron sa pagsang-at og kaso batok kang Pableo kinsa buhian na sa karsel karong udto human sa iyang reglementary period.

Si Insp. Edgar Labe, Moalboal police chief, nagkanayon nga posibleng maluwas si Pableo sa kasong kriminal apan ang IDMB  moimbestigar niya sa kasong administratiba.

"Naa na ang IR gihimo na sa imbestigador pero ako na lang i-review para i-submit karon," matud ni Labe.

Si Pableo nadestino sa Dumanjug Police Station ug bag-ohay pang nakauli sa ilaha dihang gipangayoan og tabang sa ilang silingan tungod sa tawo nga nagkamang-kamang sa ilang palibot.            Miresponde si Pableo apan dihang gisitar niya si Sab-a gikatahong misuway kini sa pagbunot og armas sa iyang kilid maong giunhan kini sa pagpusil ni Pableo.

Gidala si Sab-a sa Badian District Hospital apan gideklarar kini nga dead on arrival.

Nakuha gikan kang Sab-a ang usa ka .38 revolver nga dunay duha ka bala samtang gi-turn over usab ni Pableo ang iyang 9mm service pistol.(Ria Mae Y. Booc/EIM)

Drayber  nga nakapatay’g tulo sa Argao nakapiyansa

Nakabutang og piyansa ang driver sa dump truck nga nakadasmag sa usa ka van nga miresulta sa kamatayon sa tulo ka tawo ug dose ang nangaangol sa nakalabay’ng semana  didto sa  lungsod sa Argao.

Ang abogado sa suspek nga si Atty. Winsor Calamba, miingon nga nakabutang na og P30 mil nga piyansa si Mandy Estares, 38, taga Barangay Soton, Naga City kinsa gipasakaan og kasong reckless imprudence resulting in multiple homicide in relation to Republic Act 7610 o Child Abuse.

Kahinumduman nga niadtong Biyernes, si Fiscal Petronio Elesterio sa Cebu Provincial Prosecutor’s Office mirekomendar sa pagpasaka sa kaso batok ni Estares ngadto sa korte human mipadayag  nga di na lang tubagon ang kaso.

Ang nangamatay mao ang 10-anyos nga si Diether Caracol, nga taga Barangay Calumpang, Oslob, Cebu ug sila si Guillerma Belandres, 25, ug Rosalinda Laurente, 42. Ang mga biktima uban sa mga katagi-lungsod sakay sa usa ka Isuzu van nga gimaneho ni Jose Ramil gikan sa Oslob paingon unta nga magpa-checkup.  Apan nadisgrasya sila sa national highway sa Barangay Talaga, Argao dihang nasampak sila sa dump truck ni Estares.

Usa ka Renante Manitis nga nakakita sa hitabo miingon nga dangog ang karsada ug nag-uwan niadtong tungora.

Niadtong Biyernes, ang Argao police mipasaka usab og kaso batok kang Ramil kinsa usa sa mga nalandig sa tambalanan tungod sa samad nga naangkon. (/EIM)(BANAT NEWS)