Lawas gidayeg ni Radaza
CEBU, Philippines - Ang hepe sa kapolisan sa dakbayan sa Lapu-Lapu nga si Senior Superintendent Rey Lyndon Lawas gihatagan og taas nga "performance rating" ni Mayor Paz Radaza.
Matud ni Radaza nga maayo ang pagkadumala ni Lawas sa kapolisan sa Lapu-Lapu mao nga sa 1 ngadto sa 10 nga rating, ang mayor miingon nga anaa sa 8 ang performance rating ni Lawas.
Ang gibasihan ni Radaza mao nga daghang mga dagko nga krimen nga nahatagan dayon og kasulbaran sa kapolisan ubos sa pagdumala ni Lawas.
Giangkon ni Radaza nga dunay ubang kaso nga wala pa mahatagi og kasulbaran sa kapolisan apan pipila lamang kini itandi sa mga dagkong kaso nga nasulbad sa Lapu-Lapu City Police Office.
Sa illegal nga sugal ug drugas, kanunay ang pagmonitor ug operasyon sa kapolisan sa Lapu-Lapu.
Gipahalipayan usab ni Radaza ang mga sakop sa "Tourist Police" sa ilang hugot nga seguridad ngadto sa mga langyaw nga anaa sa mga dagkong hotel ug resorts sa dakbayan sa Lapu-Lapu.
Naglaum si Radaza nga unta lugwayan pa ang pagkadistino ni Lawas sa dakbayan sa Lapu-Lapu.
Tangkod na nga duha ka tuig si Lawas sa pagdumala sa Lapu-Lapu City Police Office karong Marso 2014 diin ang kampo Crame mihatag na og pasiunang impormasyon ngadto ni Lawas nga siya pagahulipan. (BANAT NEWS)
- Latest
