Mga turistang divers nag-vandal sa Kontiki Wall
CEBU, Philippines - Mga turistang divers nag-vandal sa mga corals nga nahimutang 86 ka tiil ang giladmon diha sa Kontiki Wall sa barangay Maribago, dakbayan sa Lapu-Lapu.
Sumala pa sa kadagkoan sa Department of Environment and Natural Resources (DENR)-7 kung sa tan-aw sa mga divers gamay ra kini nga isyu, ang labaw sa maong ahensya mipasidaan nga makaguba kini sa corals tungod kay usa lang ka pulgada kada napulo ka tuig ang pagtubo sa mga corals.
Si DENR-7 information officer Eddie Llamedo miawhag sa mga resort owners nga dunay mga underwater activities, diving schools ingon man ang mga diving professionals nga kinahanglang masayod sa mga benepisyong makuha gikan niining mga corals ug makadaot kini sa ilang panginabuhian kung kini pasagdan.
Si Andy Berame, coordinator sa Lapu-Lapu City Task Force Kalikasan mibutyag sa The Freeman nga duna sila’y mga nadiskubrehang gipangkulit sa mga corals diha sa Kontiki Wall. Gidili ni bisan kinsa ang pagtandog sa mga corals sa Kontiki Wall.
"Di pa siya alarming kay di man g’yud hinoon daghan ang suwat-suwat. Pero, kinahanglan nga di na ni siya modaghan," matud pang Berame kinsa nabalaka nga basin kun makita kini sa ubang divers ug ila usab kining sundon o palabwan pa.
Si Berame morekomendar sa siyudad nga kinahanglang edukahon sa mga diving schools ug diving professional ang ilang mga estudyante nga di tandugon o hikapon ang mga corals. "We are suspecting nga ang nag-dive gyud ani ang naghimo aning suwat-suwat. Ang atoang effort is marine conservation not marine destruction," dugang pa ni Berame.
Unom ka resorts ug water parks sa siyudad ang mipirma og kasabotan sa DENR nga ilang suportahan ang pag-amping sa coral triangle.
Ang Pilipinas nahimutang sa sulod sa 6-milyones kilometro kwadrado nga coral triangle kauban ang mga nasud sa Indonesia, Malaysia, Papua New Guinea, Solomon Islands, ug Timor-Leste, nga gihulagway sa mga siyentipiko nga tinubdan sa tanang mananap sa kadagatan sa tibuok kalibotan. (BANAT NEWS)
- Latest
