Background check sa gusto magpolis hingusgan

CEBU, Philippines - Ang Police Regional Office (PRO)-7 mopalig-on pa sa background investigation nga kabahin sa recruitment process sa mga aplikante sa pagkapulis aron paglikay nga makakuha sila og mga badlungong sakop.

Si Chief Superintendent Danilo Constantino, mibutyag nga kabahin na sa recruitment process ang background investigation apan wala kaayo kini mahatagi og igong gibug-aton kaniadto.

“Hihigpitan na sa training process pa lang para maiwasan ang pagkuha ng personnel na hindi nakakatulong sa PNP organization and one is to give emphasis sa background investigation,” matud ni Constantino.

Gawas niini kinahanglan pang makapasar ang mga aplikante sa neuropsychiatric examination, medical ug physical examinations.

“We are now after of the quality and not the quantity that’s why last year we have three recruitment schedules kasi hindi narating ng quota ang 600 personnel,” matud niya.

Dugang ni Constantino nga ang mga police recruits gihulma nga idealistic sulod sa training school apan usahay dili gyud kapugngan nga dili na nila ma-kontrol kung matintal sila sa gawas.

Usa sa gihimong sanglitanan ni Constantino mao ang kaso ni PO2 Ronilo Manuel nga nalambigit sa pagpanulis.

Kasong robbery napasaka na adtong Biyernes batok ni PO2 Manuel ug sa iyang kauban nga si Benito Andres Abiar.

Silang duha positibo nga gitudlo ni Rochel Cueco, 22, taga Bakilid, Mandaue City, nga maoy mitulis kaniya sa dalan R. R. Landon niadtong Miyerkules sa kaadlawon.

Matud ni Constantino nga aduna sila’y makanunayong in-service trainings ug seminars alang sa values formation ug padayong pag-edukar aron pagpasidaan sa kapulisan nga sila mga public servants.(/EIM)(BANAT NEWS)