Emperador mopalambo pagpamuhat og brandy

CEBU, Philippines - Ang Emperador Inc. nga maoy labing dako nga kompaniya sa bino dinhi sa Pilipinas mipahibalo kaniadtong Pebrero 13 nga ang Grupo Emperador Spain migahin og P3.7 Bilyones alang sa Bodega Las Copas S.L.

Ang Bodega Las Copas S.L. nga kompaniya ubos sa Gonzales Byass S.A. adunay halapad nga “vineyard” duol sa Toledo, Spain. Ang buhatanan og bino atua mahimutang sa Tomelloso, Ciudad Real ug ang himoanan sa brandy tua sa Jerez. Tungod niini maisip nga molambo pa ang katakus sa Bodega Las Copas paghimo og dugang mas tanlas pa imnon nga brandy.

Ang 275 hektareyas nga plantasyon sa ubas nga gidumala sa Bodega Las Copas didto sa Toledo, Spain nag-una sa Espanya ug takus nga makasuplay og mga ubas aron gamiton paghimo og daghang brandy. Ang mao nga plantasyon sa ubas migamit og binag-o ug moderno nga matang sa teknolohiya aron mosamot katanlas imnon ang Emperador Brandy.  Ang Gonzales Byass nga natukod kaniadtong 1835 maoy labing dako nga tighimo og sherry, bino ug brandy didto sa Espanya. Ang Emperador Brandy maoy ikaduha nga labing halinon nga bino sa tibuok kalibotan.  (Rene U. Borromeo/Gikan sa PR) (BANAT NEWS)