Barangay kapitan ug kawani sa CENRO gireklamo

CEBU, Philippines - Imbestigahon ang kapitan sa Barangay Tungasan, Olango Island, dakbayan sa Lapu-Lapu ug usa ka kawani sa Community Environment and Natural Resources Office (CENRO) tungod sa giingong pagtugot nila nga pangibton ang mga gamot sa bakhaw didto sa baybayon sa ilang barangay.

Si Kapitan Tritonia Abayan ug Rose Ayaang, nadistino isip facilitator sa People’s Organization sa Coastal & Marine Management Section sa CENRO, gireklamo sa usa ka Gregorio Sagarino nga molupyo sa mao nga dapit.

Nahinabi sa Brigada News FM, si Sagarino mipasangil nga si Kapitan Abayan ug si Ayaang maoy nagtugot nga pangputlon ug ibton ang mga gamot sa pagatpat  ug bakhaw aron ilang tukoran og fish pond.

Matud ni Sagarino nga siya ang mitanom sa 15 mil ka similya sa bakhaw nga gihatag sa Department of Environment and Natural Resources (DENR) kaniadtong tuig 1988. Si Sagarino nakurat na lang dihang gipangputol sa mga tawo ang dagko na nga mga bakhaw kaniadtong Oktubre sa miaging tuig. Tungod niini nagpatabang si Sagarino sa mga kawani sa DENR nga sila Henaro Soon ug Socrates Sagarino ug nasakpan nila ang mga tawo nga namutol sa mga kahoy sa dagat kaniadtong Nobiyembre.

Giila ni Sagarino kadtong namutol og mga bakhaw ug nangibot sa mga gamot sa mangroves nga sila si Perlito Sagarino,Vicentino Juezan, Simon Inoc, Arnel Inoc, Jessie Taneo, Jonathan Deligeneria, Elan Rosillo, Ronel Alibong, Renante Alibong, ug Iyoy Juezan.

Ang uban sa mao nga mga tawo nagkawot usab og lungag alang sa pagamugnaon nga fish pond sa kapitan. Matud ni Sagarino nga ang mga tawo nga ilang nasakpan mitug-an nga ang kapitan maoy nagsugo kanila.

Ang kapitan hinoon kusganong nanghimakak nga siya ang nagsugo sa mao nga mga tawo pagputol sa mga tinanom nga bakhaw ug mga pagatpat apan giangkon nga iyang gitugotan ang maong mga tawo nga putlon ang mga kahoy.

Si Eddie Llamedo nga maoy tigpamaba sa DENR miingon nga hayan mag-atubang og kasong kriminal ug administratiba ang naasoy nga kapitan tungod kay ang Republic Act 7161 nagdili sa pagputol ingon man pag-ibot sa gamot sa bakhaw.  (BANAT NEWS)