Mga balay sa probinsya lig-onon na g’yud

CEBU, Philippines - Ang pagtukod og building o dagko nga panimalay nga kuwang sa kalig-on dili na itugot sa lainlaing dapit nga sakop sa probinsya sa Sugbo aron pagsiguro nga makasugakud g’yud kini kun adunay kusog nga linog ug kusog nga bagyo.

Mao kini ang gilatid sa ordinansa sa Cebu Provincial Board nga giaprobahan kaniadto lang miaging adlaw. Kining mao nga ordinansa gitawag og Green and Disaster-Resilient Building Ordinance. Si Provincial Board Member Thadeo Ouano nga maoy misugyot sa ordinansa mipasabot nga gitumong kini aron pagsiguro nga ang tukoron nga mga edipisyo sa tanang dapit sa lalawigan sa Sugbo madesinyo nga environmental friendly ug ang kalig-on niini makabarog bisan og adunay katalagman.

Ang lakang ni Board Member Ouano gitumong aron nga masiguro ang kaluwasan sa katawhan nga moestar sa mga building ug dagko nga kabalayan. Nagpasabot nga kinahanglan nga ang pagtukod og straktura  moagi g’yud og mga engineer ug uban nga propesyonal. Ang mga dapit sa dakbayan sa Sugbo ug Lapu-Lapu dili apil nga motuman sa ordinansa kay ang duha ka dakbayan dili man sakop sa probinsya sa Sugbo.

Gipaabot nga ang ordinansa hingpit kining ipatuman sugod sunod bulan 15 ka adlaw human kini mamantala sa mga newspapers aron pagpahibalo sa katawhan niining bag-ong balaod.

Si Ouano maoy tsirman sa Committee on the Evironment and Natural Resources.  (BANAT NEWS)