Mga kulurom nga bus ipadakop sa mga bus operators

CEBU, Philippines - Ang mga tag-iya og bus dinhi sa Sugbo nakabantay nga wala gayud mapuo kining mga kulurom nga bus mao nga ilang giawhag ang mga road law enforcers nga paspasan ang paghimo’g kampanya.

Si Jolito Flores, presidente sa Cebu South Mini Bus Operators Association, miawhag g’yud sa kadagkoan sa Land Transportation Franchising and Regulatory Board (LTFRB), nga gukdon ug pangdakpon kining mao nga mga kulurom nga bus.

Matud ni Flores nga ilang namatikdan nga daghan pa gihapong kulurom nga bus nga padayong nagdagan-dagan kang kansang plaka ug body number kinopya ra sa ubang lehitimo nga sakyanan sa usa ka bus operator.

Nagdumili hinoon sa pagtug-an si Flores sa mga tag-iya sa giingon niya nga kulurom nga bus.

Si Flores nagkanayon nga nakasinati og alkanse silang lehitimo nga bus operators kay ang ubang mga pasahero mapik-ap man niining mao nga mga kulurom nga sakyanan.

Naglaum si Flores nga unta ang LTFRB magbutang og satellite office diha sa bus terminal aron matutokan pag-ayo kining mao nga binuang sa ubang bus operators.

Gusto ni Flores nga ang LTFRB mohimo g’yud og tinud-anay nga road safety ug worthiness test sa mga bus sa dili pa tugtan nga makagawas sa south ug north bus terminal pagsiguro nga luwas g’yud ang mga pasahero.  (BANAT NEWS)