Milihay sa police checkpoint napusilan

CEBU, Philippines - Napusilan sa mga sakop sa PNP Regional Public Safety Company ang usa ka lalaki human giingong mibunot sa iyang armas ug mition ngadto sa mga polis nga migukod kaniya kagahapon sa kaadlawon didto sa sitio Cambanog, barangay Jolomaynon, lungsod sa Dalaguete.

Ang suspetsado naila nga si Jeffrey Canada, 28, molupyo sa nahisgotan nga lugar.

Si Inspector Irvin Bellen nga nahinabi sa Banat News miingon nga samtang nagpahigayon sila og checkpoint sa maong dapit, ilang nasigpatan ang suspetsado sakay sa iyang motor nga may angkas nga tulo ka tawo.

Matud pa ni Bellen nga imbes nga mohunong si Canada mipasirit hinuon kini og padagan hinungdan nga gigukod kini sa mga polis.

Didto sa unahan adunay advanced team nga daling gialerto hinungdan nga dali silang gibabagan apan nangatumba.

Midagan ang suspetsado palayo sa motor ug mipadulong kini sa pangpang ug dihang gigukod gikatahong mibunot kini og armas dayon gition kini ngadto sa mga polis hinungdan nga giunhan kini sa pagpusil.

Gidala si Canada sa Vicente Sotto Memorial Medical Center tungod sa tulo ka samad pinusilan samtang ang tulo ka angkas niini gidala sa Julio Cardinal Rosales Hospital aron matambalan ang mga pangos nga ilang naangkon. Ang tulo gibuhian ra tungod kay wala man silay salaud nga nahimo.

Narekober sa kapolisan ang usa ka kalibre .38 nga revolver sa suspetsado nga may tulo ka bala lakip na ang duha ka  paketeng shabu.

Si Bellen nagkanayon nga nakadawat sila og impormasyon nga  drug runner ang suspek sa maong barangay. Nasuta usab nga walay driver’s license ug walay rehistro ang motorsiklong gidala niini. (BANAT NEWS)