Babaye ug lalaki patay sa bangga
CEBU, Philippines - Patay ang usa ka babaye ug usa ka lalaki human mabangga sa punoan sa kahoy ang ilang gisakyan nga motor alas 3:00 sa kaadlawon kagahapong adlawa diha sa Dawis Sur, Carmen.
Ang biktima naila nga sila si Allan Flores, 37, drayber ug si Jeramae Camanse, 20, pulos mga lumolupyo sa Poblacion, dakbayan sa Danao.
Si SPO2 Simplicio Gibo, desk officer sa Carmen Police Station, miingon nga misarasay ang motor sa duha ug mibangga ngadto sa Indian Tree kilid sa karsada.
Ang mga tawo nga nakaagi maoy daling mitaho sa kapolisan kabahin sa maong disgrasya.
Gidala sa Danao Provincial Hospital ang duha apan gideklarar sila nga dead on arrival.
Matud pa ni Gibo nga ang lugar dili hilan nga dapit ug dili usab kaayo kurbadahon ang karsada niini.
Apan walay nakatug-an kung kusog ba kaayo ang dagan sa motorsiklo sa mga biktima nga maoy nakaingon sa pagkalahos nila sa punoan sa kahoy. (BANAT NEWS)
- Latest
