Managsuong “guns for hire” nadakpan, mga armas ug bala nasakmit gikan nila
CEBU, Philippines - Duha ka managsuon nga gidudahang mga guns for hire ang nadakpan sa kapolisan diha sa Forest Hills, Banawa, Barangay Guadalupe ning dakbayan sa Sugbo ug nakuhaan og duha ka motorsiklo nga parehong kalabira nga pareho usab og mga plate numbers.
Ang managsuon giila nga sila si Noel Saballla, 38, ug si Jerome Saballa, 39, molupyo sa Forest Hills, Kalubihan-Banawa, barangay Guadalupe.
Si Chief Insp. Romeo Santander, hepe sa City Intelligence Branch sa dakbayan sa Sugbo miingon nga nakadawat siya og impormasyon nga may duha ka motor nga parehas og plate number 7343 DG nga milikay sa checkpoint sa Guadalupe Police Station diha sa Banawa.
Tungod niini, gialerto ni Santander ang grupo ni Sr. Insp. Wayne Magbanua nga nag-roving sa nahisgotang lugar ug nataymingan gyud nga miagi sa ilang tungod ang duha ka motor nga kusog kaayo ang padagan hinungdan nga ilang gigukod ug naabtan diha na sa Forest Hills.
Sa pagrekisa sa duha, si Noel nakuhaan og usa ka kalibre .45 nga pistola nga may unom ka bala ug usa ka Magnum .357 revolver nga may duha ka bala ingon man ang gisakyan niining motor nga may plate number 7343 DG.
Samtang si Jerome nakuhaan usab og usa ka kalibre .45 nga pistola nga may pito ka bala sulod sa magazine niini, nakuhaan sab kini og laing 40 ka bala sa kalibre .45, ug ang motor nga may plate number usab nga 7343 DG.
Ang duha kusganong mihimakak nga ilaha ang maong mga armas dihang nahinabi sila sa Banat News.
Samtang miesplikar usab sila nga gikopya ra nila ang plaka sa usa samtang gihikay na ang papeles niini aron ilaha kining magamit-gamit. Gihimakak nila nga sila mga guns for hire tungod kay sila mga drayber lang og habal-habal. (BANAT NEWS)
- Latest
