DVMF magtukod og ‘boarding house’ nga kabinlan sa mga binuhing hayop
CEBU, Philippines - Aron adunay temporaryong kapuy-an ang kahayopan ug dili mapasagdaan samtang ang ilang mga amo nagbakasyon, ang Department of Veterinary Medicine and Fisheries (DVMF) magmugna og duha ka andana nga “boarding house/center†sa mga hayop.
Sa press briefing kagahapon sa City Hall, si City Veterinarian Pilar Romero miingon nga maayo kini nga proyekto dili lang alang sa siyudad sa Sugbo kun dili ingon man sa kahayopan nga nanginahanglan usab og igong pagtagad samtang ang ilang mga amo magbakasyon gawas sa Sugbo.
Matud ni Romero nga daghan na nga mga balikbayan ang niduol sa DVMF apan wa pa sila’y maayong pasilidad sa City Abattoir didto sa North Reclamation Area.
Sa laing nasud sama sa America, naandan na usab sa mga lumolupyo ang magbilin sa ilang mga kahayopan sa giingon nga boarding house.
Matud ni Romero nga kun ugaling madayon ang proyekto, aduna g’yud kini bayad apan sabotan lamang sa tag-iya sa hayop ug sa DVMF kun unsaon ang paagi sa pagpakaon ug uban pang kinahanglan sa hayop.
“This way we are helping our kababayans and also one way of helping our animals. Madugangan pa gyud ang revenues sa city,†sumala ni Romero.
Apan matud ni Romero nga ang maong proyekto nagkinahanglan usab og milyon nga pundo. Gawas niini ila pa usab sutaon asa ang angayan nga dapit aron matukod ang maong boarding center.
Si Cebu City Mayor Michael Rama nakauyon sa maong proyekto matud niya “I like that.†Matud sa mayor nga papangitaan niya og lugar sa barangay sa bukid nga adto matukod ang boarding house sa hayop. (/EIM)(BANAT NEWS)
- Latest
