Mga bus hugtan sa pag-inspection

CEBU, Philippines - Mohimo’g inspection ang mga sakop sa Land Transportation Franchising and Regulatory Board (LTFRB) sa lainlaing mga bus nga nagbiyahe dinhi sa Central Visayas. Si LTFRB-7 Regional Director Ahmed Cuizon miingon nga ang ilang pag-inspection sa mga bus maoy pagsiguro nga ang managan nga bus pasaheroan luwas g’yud nga sakyan sa mga tawo.

Hinuon si Director Cuizon miingon nga unahon nila sa paghimo’g pakisusi mao kadtong mga bus nga gipanag-iya sa kompaniya nga kang kansang mga bus dili na mga bag-o.

Matud ni Cuizon nga ang pagpahigayon nila og inspection sa mga bus nga nagbiyahe sa amihanan ug habagatang bahin sa lalawigan sa Sugbo gibase kini sa kamandoan sa ilang ulohang buhatan. Mihimo og kamandoan ang LTFRB-Manila ngadto sa ilang mga regional offices nga susihon ang mga bus nga nagbiyahe sa ilang rehiyon human nga nahagbong ang Florida Bus didto sa Bontoc, Mountain Province nga gikamatay sa 15 ka pasahero apil ang comedian nga si Arvin Jimenez nga mas naila sa ngalang "Tado."

Ang kamandoan sa ulohang buhatan sa LTFRB gitinguha nga mapatuman dayon sa labing daling panahon aron malikayan ang dugang disgrasya sa kadalanan nga maglambigit sa mga bus.  (BANAT NEWS)