Tindera’g imahen dili na kuno magpabadlong

CEBU, Philippines - Mga naninda og imahen sa mga santos likud sa Basilica del Santo Niño misaad nga dili na sila magpabadlong.

Si Merlinda Batiller nga naila sa angga nga “Inday” ngadto sa iyang mga kauban miingon nga wala sila mahiubos nga gisirad-an sa City Hall ang ilang mga tindahan bali’g tulo ka adlaw.

Giangkon ni Batiller nga nakalapas gayud sila sa gilatid sa City Hall nga dili na ukopahon ang karsada ug wala mopatuo bisan og mihatag na kanila og pasidaan si City Administrator Lucelle Mercado.

Nakadayeg ang mga tindera og imahen sa mga santos sa kalig-on sa baruganan ni Mercado nga mopatuman gayud sa balaod aron nga magkinto kadtong mga naninda sa aseras.

Ang mao nga mga vendors dugay ra kaayo nga nagbutang og mga lamesa ug lingkoranan gawas na sa puthaw nga railings ug nakabalda na sa pag-agi sa mga sakyanan.

Ang mga tindera dugay ra nga gibauran nga ang ilang mga baligya dili ipagawas sa tindahan aron kadtong mga customers mosulod sa puthaw nga railings og dili makabalda sa karsada.

Si Mercado nga bag-ohay pa nga gitudlo ni Mayor Michael Rama isip city administrator gitugyanan usab sa mayor pagpahapsay sa mga aseras sa dakbayan. (BANAT NEWS)