Taiheiyo mitabang sa mga biktima sa bagyo

CEBU, Philippines - Ang kagamhanan sa probinsiya sa Sugbo nakadawat og hinabang-salapi gikan sa Taiheiyo Cement Corporation (TCC) sa Japan ug sa kompaniya niini sa Sugbo nga mao ang Taiheiyo Cement Philippines, Inc. (TCPI).

Si Satoshi Asami chief executive officer (CEO) sa TCPI personal nga mipaabot sa mensahe ni Shuji Fukuda, presidente sa TCC ngadto kang Gobernador Hilario Davide, III ug Bise Gobernador Agnes Magpale.

Ang nahisgutang kompaniya mihatag og P2 milyones nga hinabang-salapi gikan sa Japan direkta kini ngadto sa account sa probinsiya diha sa Development Bank of the Philippines (DBP).

Ang maong hinabang alang kini sa mga naapektohan sa milabay’ng bagyong Yolanda sa amihanang bahin sa probinsiya sa Sugbo.

Si Fukuda sa iyang suwat ngadto kang Davide nanghinaot nga ang maong hinabang magamit pagpalit og mga housing materials aron ang mga nabiktima sa bagyong Yolanda makapabarog pag-usab og pinuy-anan.

Sila si Yasuhiro Yamamoto, Senior Vice President (SVP), Antonio Chiu, consultant ug Nilo Yap, corporate affairs manager miuban sa paghatag sa hinabang ngadto sa kagamhanan sa probinsiya.

Gawas sa salaping hinabang ang Taiheiyo direkta usab nga nanghatag og mga hinabang nga magamit dayon sa mga biktima sama sa mga pagkaon ug sinina niadtong Nobiyembre 8, 2013.

Dili lang mga nabiktima sa amihanang bahin sa Sugbo ang gitabangan sa maong kompaniya, mitunol usab sila og hinabang sa dakbayan sa Tacloban ug Guiuan, Samar ug sa mga biktima sa linog sa probinsiya sa Bohol. (BANAT NEWS)