Hapon nabiktima sa Salisi Gang

CEBU, Philippines - Dul-an sa P100 mil ang kantidad sa cash ug butang ang nasakiyo sa upat ka tawo nga gidudahang “Salisi gang” human nila makuha ang bag sa usa ka Japanese national sud sa usa ka donut shop sa I.T. Park, Barangay Apas, dakbayan sa Sugbo kaniadtong miaging hapon. Ang biktima giila nga si Takayuki Kamezu, 48, kasamtangan nga nagpuyo sa barangay Hipodromo, dakbayan sa Sugbo mitaho sa hitabo ngadto sa Theft and Robbery Section (TRS) sa Cebu City Police Office.

   Samtang si Kamezu ug ang iyang duha ka amigo nga Hapon nag-estorya sa gawas nga bahin sa maong shop dunay usa ka lalaki ug usa ka babaye nga milingkod sa lingkoranan atbang sa ilang gilingkoran.

 Wala lang manumbaling si Kamezu tungod kay nagtuo siya nga customer sab sa maong shop ang duha apan iyang nabantayan nga duna pay laing duha ka lalaki nga nagsige og lakaw-lakaw sa ilang atubangan. Pipila ka higayon ang maong duha ka lalaki miali kaniya ug wala na kini kabantay nga ang iyang bag nga gibutang sa iyang kiliran gikuha diay sa lalaki ug babaye nga naglingkod sa ilang atubangan.

Ang maong bag may sulod nga tulo ka cellphones,usa ka Ipod, pitaka nga may sud nga P3 mil ug duha ka mastercard.

Gipangayo na karon sa kapolisan ang CCTV footage sa maong shop aron mailhan ang gikatahapan. (BANAT NEWS)