Mayor Rama mipahimangno sa mga senior

CEBU, Philippines - Duna gihapo’y daghang senior citizens nga wala makakobra kagahapon sa gipanghatag nga ‘tag P3,000 nga cash assistance gikan sa kagamhanan sa dakbayan sa Sugbo dihang gihimo ang pagpang-apud-apod niini sa kabarangayan.

Nakapahugot kini sa pagduda nga daghan g’yud sa kapin sa 59,000 ka senior citizens nga wala na magpuyo dinhi sa dakbayan mao nga wala sila makakubra sa ilang hinabang-salapi.

Si Mayor Michael Rama mopaestrikto nga kadtong mga senior citizens nga dili gihapon makakobra sa ilang cash assistance lapas sa 15 ka adlaw gikan unya sa Lunes dili na gayud hatagan pa.

Matud ni Rama nga walay dagko nga problema nga mitumaw sa pagpanghatag sa cash assistance kagahapon. Sa buntag ang gihatagan mao ang nagpuyo sa mga barangay sa north district ug pagka hapon kadto na usab nga nagpuyo sa mga barangay sa south district.

Bisan Sabado, apan ang mga department head sa City Hall gipatrabaho sa mayor aron magsilbi sila nga superbisor sa pagpang-apud-apod sa cash assistance sa lainlaing mga barangay nga moabot og P180 milyones.

Giawhag ni Rama kadtong wala makakobra kagahapon nga moadto sila sa City Treasurer’s Office sugod karong Lunes.  (BANAT NEWS)