Fire station mugnaon sa Kapitolyo

CEBU, Philippines - Butangan pagbalik og fire station ang Kapitolyo aron makaresponde dayon kini kun adunay mahitabo nga sunog sa duol nga mga dapit.

Si Loy Anthony Madrigal nga maoy pangulo sa security force sa Kapitolyo mibutyag nga magmugna usab og fire brigade ang kagamhanang probinsyal nga langkoban sa mga kawani sa lainlaing departamento.

Matud ni Madrigal nga tudloan ang mga mamahimong sakop sa fire brigade aron sila makat-on sa ilang mga trabaho pagresponde og sunog.

Ang mga opisyal sa Kapitolyo nagplano gani nga mopalit og usa ka fire truck ug ubang fire-fighting equipment aron epektibo g'yud ang pagresponde og sunog sa mga sakop sa pagamugnaon nga Capitol Fire station.

Ang kabomberohan kaniadto nagbutang og fire station sa Kapitolyo ug nagdistino sila og usa ka fire truck apan wala mahibaw-i kun nganong giwagtang ang mao nga fire station taud-taud na nga panahon.

Kun adunay sunog nga moulbo dapit sa Kapitolyo ang fire truck nga labing duol nga moresponde mao ang gikan sa Barangay Lahug ug ang mga sakop sa Filipino-Chinese Fire Brigade nga nagbase kapin sa usa ka kilometro ang gilay-on.

Ang kadagkoan sa Bureau of Fire Protection (BFP) nagkuwang og mga fire trucks kay wala gani kini makadistino og bisan usa ka fire truck sa tanang lungsod sa Sugbo.

Ang mata'g fire truck mokantidad og kapin sa P10 milyones apil ang iyang mga ekipo.   (BANAT NEWS)