Kong. Gullas miawhag kang Mayor JVR nga ipatawag ang Board of Trustees sa TCC
CEBU, Philippines - Si Kongresista Gerald Anthony “Samsam†Gullas, Jr. miawhag kang Mayor Johnny De los Reyes sa pag-convene sa Board of Trustees (BOT) aron mahunong na ang isyu tali sa presidente karon sa Talisay City College (TCC) nga si Richel Bacaltos ug sa bag-ong gitudlo sa mayor nga si Paulus Mariae Cañete.
Kahinumduman nga si Cañete gitudlo nga bag-ong presidente sa TCC ubos sa executive order sa mayor apan gisaway kini sa iyang kaalyado nga si Bise Mayor Romeo Villarante.
Matud pa ni Villarante wala magsubay sa saktong proseso ang pagkatudlo kang Cañete kay wa kini pagtugot sa board.
Si Gullas kinsa miyembro sa BOT dihang nahinabi sa mga tigbalita miawhag kang Mayor Johnny De los Reyes kinsa maoy tsirman sa BOT nga i-convene ang BOT aron matapos na ang maong isyu.
Matud ni Gullas nga naapektahan karon sa maong kasamok ang mga estudyante sa TCC.
Ang kongresista miingon nga bugtong ang BOT resolution ra ug dili ang executive order sa mayor ang makamando paghulip kang Bacaltos.
Matud usab ni Gullas nga motambong siya sa tigom kung mag-convene ang BOT aron makagama og pinal nga desisyon sa sitwasyon karon sa TCC.
Si Gullas naglaom nga mahusay sa kadagkuan sa TCC ang problema karon ug dili na kini maabot pa ngadto sa husgado. (BANAT NEWS)
- Latest
