Dunay cyberpornography den sa Cebu City — Magpale

CEBU, Philippines - Gibutyag ni Bise Gobernador Agnes Magpale nga ang cyberpornography nga nigamit og mga bata dili lang sa probinsya nahitabo kun dili hasta sa Cebu City.

“(Cyberpornography) is not rampant but it’s unfair to say it’s only in Cordova. Sa Cebu City sad naa,” matud ni Magpale sa interview. Sumala pa ni Magpale, duna sila karoy gipanid-ang panimalay dinhi sa Cebu City nga naa sa usa ka subdivision diin mga batang babaye ang pirmeng makit-an nga mosulod ug mogawas paglabay og pipila ka oras nga nakapaduda sa mga silingan.

Matud pang Magpale mga batan-ong babaye nga mga tinun-an sa high school ang pirmeng makit-an nga manulod og balay ug dugay kaayong manggawas, susama niini nga operasyon ang ilang naobserbahan sa mga gipanid-ang mga gidudahang cyber crime haven sa probinsya nga ilang gi-surveillance.

Apan ning bag-o, naobserbahan nila kini sa usa sa mga subdivisions sa Cebu City ug nasuta nila nga dunay usa sa mga minors nga taga probinsya maong ilaha kini karong gitutokan. Ang nakalahi lang niini sa kaso sa Cordova, ang operasyon naa gibuhat sa subdivision ug kinahanglan pa nilang mo-coordinate sa mga molupyo aron makasud.

Ang modus operandi sa cyber sex dens matud pang Magpale magpakaaron-ingnong small-time call center business. Ang mga babayeng manarbaho niini magpakaaron-ingnong mga call center agents nga magsud-gawas sa maong establisamento.

Apan ang tinud-anay nga trabaho mao diay ang pag-perform og mga malaw-ay nga buhat atubangan sa camera samtang nagtan-aw ang langyaw nga online customers.

Gawas sa ingon niini nga paagi, si Magpale nagkanayon nga duna say mga pribadong balay nga mihimo niini ug advance pa ang bayad nga gipadala pinaagi sa money couriers, ang mga babaye mohimo og mga malaw-ay nga buhat atubangan sa webcam kun makompleto na ang transaksyon.

Samtang sa mga subdivision, sagad sa mga nagpadagan niini mga langyaw matud pang Magpale.

“Sa cyberporn, naa na silay contact. Ilang website known na sa would-be clients. Client would ask for a child or someone with a specific age. Mosud na gani ang kwarta sa money transfer, right away ig kuha sugod na ang show,” matud niya.

Hinuon nagpasalamat si Magpale sa kooperasyon sa mga money couriers tungod kay motawag sila dayon sa ilang buhatan kung dunay usa ka tawo nga modawat og dili lang kausa sa usa ka adlaw og kwartang gipadala gikan sa laing lugar.

Sayo niini, si Magpale nasagmuyo sa kahinay sa paghusay sa mga kasong nalambigit sa cyber crimes bisan sa kadaghan na sa ilang mga nadakpan. (BANAT NEWS)