Tinun-an miundang, gikasab-an sa Pari

CEBU, Philippines - Usa ka 16-anyos nga tinun-ang babaye sa Talisay City College napugos pag-undang pag-eskwela tungod kay gibati siya’g grabe’ng kauwaw dihang gikasab-an ug gipakauwawan sa pari niya nga maestro atubangan sa iyang mga kaklase.

Gani ang dalagita nakaisyu na og “affidavit” nga nagsaysay sa hitabo aron maoy basihan sa posible nga pagpasaka og kaso batok ni Padre Judito Rosende nga matud pa atua madistino sa simbahan sa lungsod sa San Fernando.

Nasayran nga unang gikomedyahan sa dalagita ang pari ug giingnan nga “Salbahisa sad nimo sir uy” dihang ang pari miingon nga mopahigayon na og examination bisan ang duha ka tinun-an aduna pa’y gipahigayon nga meeting.

Ang duha ka tinun-an nga wala pa sa classroom mao ang president ug treasurer sa ilang klase. Matud sa dalagita nga komedya ra ang iya ngadto sa pari kay mao kini sagad nila himoon nga magkomedyahay.

Apan ang pari nasuko ug gipagawas ang dalagita sa classroom. Human sa klase, ang dalagita nga didto ra sa gawas sa classroom naagian sa pari ug matud pa gihan-an paglabay sa iyang sudlanan sa eyeglasses.

Wala matagbaw gitulisok pa ang dalagita og giingnan. “Bogu ka, taga bukid ka, pobre ka mao nga mieskwela ka aning eskwelahana kay pobre ka!”

Matud sa dalagita nga giingnan siya sa pari sa makadaghan nga higayon nga dili na siya gusto nga makakita pa sa iyang panagway sa tunghaan.

Ang amahan sa dalagita nga usa ka mekaniko nabalaka kaayo sa dangatan sa iyang anak.

Sa interview sa mga reporters, si Padre Rosende miangkon nga wala lang siya makapugong sa iyang kasuko dihang gisungog sa mga kaklase sa dalagita human giingnan nga salbahis.

Matud ni Padre Rosende nga nangayo na siya’g pasaylo sa dalagita ug giingnan nga hatagan niya kini og special test apan wala na motagad pa ang tinun-an.

Ang presidente sa Talisay City College nga si Richel Bacaltos mipasalig nga imbestigahon nila kining mao nga kaso ug kun mamatud-an nga sad-an ang pari pahamtangan nila kini og silot.  (BANAT NEWS)