Giipit og pliers sa ginikanan

CEBU, Philippines - Giluwas sa kapolisan ang managsuong 3-anyos ug 5-anyos nga batang babaye nga gidagmalan ug gitanggong sa ilang inahan ug ama-ama sulod sa ilang balay sa barangay Bitoon, Dumanjug kaniadtong Miyerkules sa hapon.

Ang mga bata gitrangkahan sulod sa balay nga walay pagkaon, matud ni PO3 Dionesio Tagupa nga maoy nag-imbestigar sa maong kaso.

Matud ni Tagupa nanglakaw ang 22-anyos nga inahan ug 19-anyos nga ama-ama sa mga bata alas 8:00 sa buntag niadtong Miyerkules.

Si Tagupa nagkanayon nga usa ka kawani sa munisipyo nga si Arnel Famor maoy mitaho sa kapolisan kabahin sa kahimtang sa maong mga bata nga kanunay lang dagmalan sa ilang ginikanan.

Matud ni Tagupa nga sa ilang pag-abot sa balay sa magtiayon ilang nasuta nga gitrangkahan g’yud sa sulod ang mga bata mao nga ilang giguba ang bentana pinaagi sa pagligwat og kahoy aron makasulod sila ug maluwas ang mga bata.

Ang mga silingan sa duha ka bata daling mihatag og pan kay wala pa sila makakaon sa udto.

Nakurat usab ang mga polis kay ilang nakita ang duha ka bata daghan og mga samad sa ilang kalawasan, lakip na ang ilang mga dunggan ug ilong tungod kay matud pa gipapaakan og pliers sa ilang ama-ama.

Samtang ang 5-anyos nga bata duna say mga bun-og sa iyang tiil nga gidudahang inagian sa bunal. 

“Kung makakita lang ka sa bata makahilak g’yud ka kay luoy g’yud kaayo sila tan-awon unya ingon ang silingan nga daug-daugon lang kuno na,” matud ni Tagupa.

Dihang miabot pasado alas 6:00 sa miaging gabii ang inahan ug ama-ama sa duha ka bata, dali silang gisikop sa kapolisan ug gitanggong sa Dumanjug Police Station.

Ang duha pasakaan og kasong kalapasan sa RA 7610 o Child Abuse.

Matud pa nga ang ama-ama sa mga bata miangkon nga usahay iyang ipiton ang dunggan ug ilong sa 3-anyos tungod kay tapolan.

Ang duha ka bata gidala na sa mga kawani sa Department of Social Welfare and Development (DSWD) aron himoan og psychological examination sa dili pa kini dad-on sa Home for the Girls sa barangay Labangon, dakbayan sa Sugbo. (BANAT NEWS)