CEBU, Philippines - Nangayo’g tabang ang mga lumolupyo sa Sitio Sampaguita, Barangay Banilad, Mandaue ngadto sa mga opisyal sa ilang dakbayan aron dili madayon ang demolisyon sa ilang kabalayan.
Matud sa mga lumolupyo nga nakadawat na sila og kamandoan gikan sa hukmanan nga sila papahawaon na sa ilang gipuy-ang luna nga iya ni Atty. Benjamin Rallon.
Sa ilang suwat ngadto ni Mandaue Mayor Jonas Cortes, ang mga lumolupyo nangiliyupo nga unta tabangan sila sa mga opisyal nga dili madayon ang demolisyon.
Adunay 98 ka pamilya nga gilangkoban sa 780 ka tawo nga anaa nagpuyo sa yuta.
Si Jimmy Saromines nga maoy tigpamaba sa Saint Vincent Ferrer Homeowner’s Association, Inc. miingon nga tulo ang ilang hangyo sa mayor.
Ang una mao ang dinalian nga pag-interbener aron kapugngan ang demolisyon sa Hunyo niining tuiga, ikaduha nga dalion ang pagpasar sa konseho og ordinansa nga magdeklarar sa Backshell, Banilad isip Socialized Housing Site ug ang ikatulo mao nga hingusgan ang paningkamot nga makakita og pundong salapi alang sa pagpalit og yuta nga mahimo nilang permamenting kapuy-an. (BANAT NEWS)