Gibiyaan sa pamilya ginang naghikog

CEBU, Philippines - Patay nang miabot sa tambalanan ang usa ka inahan human kini maghikog sa Zone Kasag, Brgy. Kalawisan dakbayan sa Lapu-Lapu kagahapon sa buntag.

Ang naghikog mao si Jocelyn Ejorango Abelgas, 30, residente sa maong dapit kinsa giingong gibiyaan na sa iyang pamilya. Sa pasiunang imbestigasyon ni PO3 John Carlo Jocotan, nasuta nga mga alas 7 kagahapon sa buntag, ang apohan sa namatay nga si Carmelita Pogoy Ywayan nahibulong nganong wala mangabli sa iyang tindahan si Abelgas. Sa pagsusi niini sa sud sa balay, nakugang si Ywayan nga nagbitay na sa lawak ang iyang apo nga dunay gilubid nga habol sa iyang liog.

Daling nakapangayo og tabang si Ywayan nga madala sa Lapu-Lapu City hospital, gideklarar kini nga patay na sa mga mananambal.

Gidudahan sa kapolisan nga problema sa pamilya ang hinungdan sa paghikog ni Abelgas human gikuha sa mga ginikanan sa bana niini ang ilang anak ug wala na kini mahibalik ngadto kaniya. Gawas pa niini bag-o lang usab gibiyaan si Abelgas sa iyang kapuyo hinungdan nga posibleng nawad-an na kini og paglaom sa kinahuhi ug nagpakamatay.

Wala’y nakitang foul play sa patay’ng lawas ni Abelgas apan gipaubos kini sa usa ka autopsy sa pagdeterminar sa hinungdan sa kamatayon niini. (BANAT NEWS)