CEBU, Philippines - Mopahigayon unya og mga training ug workshop para sa mga barangay tanod ang Association of Barangay Councils (ABC) - Cebu City Chapter ug ubang ahensya kabahin sa pagsugpo sa cyber-pornography sa Cebu.
Kini human giaprobahan kagahapon sa Konseho sa dakbayan sa Sugbo ang resolusyon nga nag-awhag sa mga barangay sa pagpahigayon og mga lakang sa pagpakunhod ug pagtapos na sa maong krimen.
Matud pa sa Philippine National Police, ang cyber-pornography maoy giingong nag-unang krimen karon sa nasud ug usa ang Cebu sa top four transmittal sites sa online pornography.
Gawas sa ABC, apil sa giawhag ang National Bureau of Investigation (NBI) 7 ug mga non-government organizations (NGOs) kansang adbokasiya mao ang pakigbatok sa child pornography.
“They are requested to organize or initiate trainings and workshops for barangay tanods and officials so they can help prevent, curb, or stop possible cyber-pornography activities or cybersex dens in their respective barangays, as barangay officials are the first line of defense against cyber-pornography,†matud pa sa resolusyon ni Konsehal Alvin Dizon.
Si Dizon, miawhag usab sa Cebu City Children’s Commission nga tun-an ang mga palisiya nga epektibong makapalikay o makapa-undang sa child pornography sa dakbayan sa Sugbo.
Si Konsehal Margarita Osmeña, human miuyon sa maong resolusyon, miawhag usab sa mga barangay opisyal pag-activate sa ilang nagkadaiyang Barangay Council for the Protection of Children (BCPC). (BANAT NEWS)