Demolisyon sa CCMC pasugdan dayon

CEBU, Philippines - Bisan gipadaplin una sa konseho sa syudad sa Sugbo ang pagpasar sa Site Development Plan sa Cebu City Medical Center (CCMC), si Konsehal Mary Ann Delos Santos gusto nga masugdan na dayon ang demolisyon.

“We will determine to hit that and we don’t want to blink on that one,” sumala ni Delos Santos.

Ang konseho sa regular session kagahapon mipadaplin una sa Site Development Plan kay tukion pa kini sa public hearing sunod semana.

Si OIC city engineer   Jose Marie Poblete maoy mopresentar sa plano apil na ang “technical aspects” sa bag-ong tambalanan.

Matud ni Delos Santos andam na sila sa demolisyon gani giaprobahan na kini sa Office of the Building Official (OBO), mipahigayon na og public hearing sa mga apektadong residente sa barangay Pahina Central nga giuyunan ra usab sa mga lumolupyo.

Si city legal officer Jerome Castillo maoy mo follow-up ngadto sa Commission on Audit (COA) alang sa pagtugot sa demolisyon.

Samtang ang mga Japanese nationals o gitawag ni Delos Santos nga “missionaries coming from the Japanese government” nga una nang mipadayag nga motabang sa syudad sa Sugbo ilabi na sa CCMC, mopahigayon og assessment sa tambalanan kuyog sa ilang mga expert nga doctor ug technical engineers. (BANAT NEWS)