Trak nabalitok bata nadat-ogan

CEBU, Philippines - Patay ang usa ka bata ug angol ang kauban niini dihang nadat-ogan sa nibalitok nga Isuzu Forward truck didto sa barangay Tabunan, dakbayan sa Sugbo alas 4:00 sa miaging hapon.

Ang namatay giila nga si John Mark Son, 7, tinun-an sa Grade 2, samtang naangol si Rithel Tubod, 8, tinun-an sa Grade 3, pulos mga molupyo sa maong barangay.

Natanggong karon ang drayber nga si Alejo Pador, 49, molupyo sa nahisgutan nga lugar.

Si Manuel Tagaan sa records section sa Cebu City Traffic Operations Management (CITOM) nga nahinabi sa Banat News miingon nga nagsubida ang maong trak  nga may plate number YDV 973 apan nabali ang axle niini.

Nibalitok ang maong trak hinungdan nga nangadat-ogan sa chassis ang duha ka bata nga niadtong tungora naglakaw pauli gikan sa eskwelahan.

Patay diha dayon si Son, samtang gidala sa Vicente Sotto Memorial Medical Center si Tubod.

Mitahan  sa kapolisan si Pador apan gibuhian kini human sa panagsabot-sabot tali sa pamilya sa mga biktima nga abagahon niini ang mga galastuhan sa pagpalubong ug pagpatambal sa naangol.

Samtang, mitahan usab sa iyang kaugalingon ngadto sa kapolisan ang drayber sa usa ka delivery truck nga nakabangga sa usa ka bata pasado alas 10 kagahapon sa buntag sa barangay Talisay, lungsod sa Santander.

Ang nakalas mao si Denisa Atienza, 3, nga kuyog sa iyang apohan dihang nahitabo ang maong aksidente.

 Matud pa ni PO3 Anthony Aba, desk officer nga mitahan si Nonilo Catalan, 26, taga Nalhub, Dalaguete human sa aksidente. Matud pa gikan sa Samboan padulong sa Santander si Catalan dihang pag-abot sa nahitaboan mi-overtake kini og traysikol apan wala kini makabantay sa paglabang sa biktima kauban sa apohan ug napunggit niini ang bata. Wala na madala pa sa tambalanan ang biktima. (BANAT NEWS)