Mga benepisyo sa condom

CEBU, Philippines - Niadtong bag-o pa kini girekomendar isip usa sa labing luwas o epektibo sa pagplano sa pamilya, wa kaayo’y nanumbaling bisan pa man gi-edukar kita sa gobiyerno. Nataligam-an ang mga benepisyo nga mahatag sa pagbaton og maayong kalidad sa pagdumala sa pamilya, nga gibase sa atong masarangan. Gihatagan kita’g giya kun unsaon gayud ang hustong paggamit sa condom. Daghan usab ang mga reaksyon niadtong nakagamit, nga kuno nakahasol lang.

Adunay mipursige gayud sa paggamit ini aron di modaghan ang ilang anak. Apan wa gyu’y lami kuno ang pag-sex nga may kondom, ma wala ang kalalim nga batyagon. Pipila lang kini sa mga negatibong kasinatian sa mahiligon kayo sa seks nga nagpangita sa katagbawan. Maong sige pa ang pagtuon sa atong mga sayantipiko mahitungod sa condom. Nagdiskubre og dugang paagi nga mas kahinaman na kini nga labaw pang makapagana sa buhatong pakigseks.

Karon dili na ordinary ang condom. Aduna nay daghang klase paggamit ini ug aduna nay kapilian segun sa panginahanglan. Nagkalainlaing disensyo, kolor, palami o flavor, aron gyud ganahan sa pagseks. Naa na poy mga texture o ugat-ugat sa condom, nga inig duwa na, mapukaw dayon ang kalalim sa gana sa babaye ug lalake, nga mas pa kay sa wala mogamit og condom. Sulayi ang latex (gomahon) o ang polyurethane (plastikon), kun asay di maka-alergy sa paris.

Bentaha na sad ni kay may mga benepisyo kining mahatag kanato.

(1) kompiyansa na kayo nga di gyud mo mabdos ang babaye.

(2) Mopawagtang sa mental, pisikal ug emosyonal stress.

 (3) Makapadasig sa atong pagka-binuhat.

4) Makapalig-on sa relasyon diha sa pagminahalay.

(5) Malipayon ug malaumon sa kinabuhi.

(6) Mogaan pas-anon ang mga suliran.

(7)Makab-ot ang giplano nga pamilya.

(7) Ug ang tumang katagbawan sa pagseks.

Og labaw sa tanan, ang condom maoy proteksyon o depensa sa pagkatakud sa mga virus nga daghan na karon ang nataptan sa kanser gumikan sa pagseks sa lain nga adunay sakit. Kun mogamit sa kondom, kausa lang og ayaw kahinugon kay dali na ni mabuslot, tungod kay naabuso na kini sa kainit sa kombate. Higpiton usab sa disiplina ang pagseks kay basig ikaw makompromiso. Di mo lang unya damhon moabot ang kadismaya nga mopakagot sa pag-antos. (BANAT NEWS)