CEBU, Philippines - Mga health center sa kabarangayan sa dakbayan sa Talisay hatagan og mga hospital bed gikan sa foundation nga gipasiugdahan sa pamilya ni city councilor Aldin Diaz.
Si Diaz mitug-an sa mga reporters nga nakahatag na sila og duha ka hospital bed sa health center sa Barangay San Roque, usa sa Barangay Cansojong ug laing usa ka Barangay Mohon ug kagahapon lain na usab didto sa health center sa Barangay Lagtang.
Matud ni Diaz nga ang tanang 22 ka health center sa Talisay hatagan g’yud nila og hospital bed.
Gibutyag ni Diaz nga 20 ka tuig na ang nakalabay ang foundation sa ilang pamilya nga dunay kaatbang didto sa Australia nagsige na og pagpanghatag og mga hospital bed ug mga sungkod alang sa mga bakul dili lang sa Talisay kon dili apil na sa laing mga lugar.
Si Diaz miingon nga kaniadto pa ang ilang foundation nakig-alayon sa mga Local Government Unit (LGU) aron makapang-apod-apod og hinabang.
Matag tuig duha ngadto sa tulo ka 40-footer container van ang maabot dinhi sa nasud gikan sa kasosyo nila nga foundation sa pamilya ni Diaz sa Australia nga dunay kargang mga hospital bed ug uban pang kagamitan apil sa ginamit nga sapot.
Dugang ni Diaz nga ang second hand nga hospital bed kung paliton gibana-bana nga mokabat sa P35 mil ngadto P45 mil ang presyo matag usa ug ang mga electronic nga second hand nga hospital bed mokabat ngadto sa P85 mil. (BANAT NEWS)