13-anyos gidala sa motel sa nakaila sa internetan

CEBU, Philippines - Gipasakaan sa kapolisan og kasong Acts of Lasciviousness in relation to Child Abuse ang 19-anyos nga tinun-an sa kolehiyo nga midala sa 13- anyos nga batang tinun-an sa high school sa usa ka motel sa barangay Guizo, dakbayan sa Mandaue sa miaging gabii.

Si PO1 Juliet Trogo sa Women’s Desk Section sa Presinto 1 sa Mandaue City Police Office (MCPO) miingon nga ang pagmolestiya sa suspetsado sa biktima unang namatikdan sa igsoong lalaki tungod sa naangkon nga mga tsikinini sa liog niini.

Gisumbong sa magulang nga lalaki ang iyang nakita ngadto sa ilang inahan kinsa mitug-an sa gihimo niini nga pagsukitsukit nga gidala kini sa lalaki nilang silingan sa sulod sa  usa ka motel.

Matud pa nga nagkaila ang duha sa usa ka internet café ug nagkahigalaay. Si PO1 Trogo nga nahinabi sa Banat News miingon nga ang biktima miasoy nga una siyang gidala sa suspetsado sa barangay Paknaan diin sila nag-inom ug wala na kini masayod nga gidala sa suspetsado sa usa ka motel kay hubog na kini niadtong higayona. Dugang pa sa biktima nga nasayod na lamang kini nga didto na sila sulod sa lawak sa pagmata niini nianang pagkabuntag ug ang suspetsado nakigdulog kaniya.

Si PO1 Trogo miingon nga ilang gipaubos sa medical examination ang biktima apan migawas sa resulta nga wala kini mahilabti sa suspetsado hinungdan nga  di na lang nila ipasaka ang kaso nga pagpanglugos.

Matud pa ni PO1 Trogo nga ang kapolisan sa Presinto 4 nag-andam hinuon og dugang kasong abduction of minor ug gikatakda kining ipasaka karong adlawa.  (Romeo T. Limpangog/EIM)

Mga pamilya sa Apas nag-vigil vs. demolisyon

Pipila sa 157 ka pamilya sa Sitio San Miguel, Barangay Apas ning dakbayan sa Sugbu nga apektado sa demolisyon mipahigayon og prayer vigil kagahapon hangtud Pebrero 17, ang adlaw sa pre-demolition conference.

Sa unang adlaw sa prayer vigil kagahapon, ang mga apektadong banay nagprosisyon ug nag-ampo sa lots 942 ug 947 nga gikatakdang demolison karong umaabot Marso 4 ning tuiga.

Matud ni Roel Auxtero, pangulo sa Morning Dove Homeowners sa Lot 942 nga tinuod nga hustisya ang ilang gipangayo batok sa "land grabbers."  Ang mga homeowners nagbitbit sa ilang mga placards nga nag-ingon "land grabber cancer sa katilingban."

Nanghinaot usab ang mga apektadong pamilya nga mahunong ug masugpo na ang 'systematic land grabbing."

Nangayo usab ang mga homeowners og tabang sa kagamhanan sa syudad sa Sugbo ug sa provincial government.  "We will resort to any legal remedy kay naa man Executive Order No.20," matud ni Apas barangay captain Ramil Ayuman.  Gimandoan na usab ni Cebu City Mayor Michael Rama ang Department of Welfare and Urban Poor (DWUP) pagsusi sa maong problema.

Ang writ of demolition giluwatan ni Judge Pamela Baring sa Branch 6 sa Municipal Trial Court in Cities (MTCC) niadtong Enero 23 ug gihatagan lang og 30 ka adlaw  ang mga molupyo sa pagbiya na sa maong lugar.

Si Aletha Suico-Magat maoy miduso og writ of demolition batok sa mga residente,

"Aletha Magat pahawa, palayo pauli kun diin ka gikan ayaw pataka og pangangkon og yuta," matud sa mga homeowners.

Ang mga homeowners mibahad nga dili sila mohawa gumikan kay ang yuta gipanag-iya man sa provincial government. Ang yuta kanhi gigamit sa Bureau of Air Transportation dihang kini diha pa ang Lahug Airport, nga karon Asiatown I.T park.  "Di mi mohawa bisan papahawaon mi," sumala ni Auxtero. (BANAT NEWS)