DSWD miawhag sa siyudad atimanon mga libud-suroy

CEBU, Philippines - Giawhag sa Department of Social Welfare and Development (DSWD) 7 nga hugtan pa sa dakbayan sa Sugbo ang kampanya batok sa mga libud-suroy nga kabataan ilabi na nga nangandoy pagbalik ang syudad nga malangkat pagbalik ang Child-Friendly City Award.

Si Emma Patalinghug, Children's Welfare Specialist, miingon nga ang lokal nga kagamhanan maoy kinahanglang mangulo pagsulbad sa mga bata nga anha ra mangatulog ug magpuyo sa aseras.

Dugang ni Patalinghug nga ang DSWD 7 nakigtigum na sa Task Force on Street Children ug gani naimbitar na siya sa maong task force sa ilang mga regular nga meeting.

Wala hinoon siya makatambong sa tigum niining milabay’ng mga adlaw tungod sa sunod-sunod nga katalagman nga miigo sa Sugbo ug sa Kabisay-an.

Gikalipay ni Patalinghug nga nalimpyo na ang dapit palibot sa Redemptorist Parish tungod sa mga social workers nga maoy nag-atiman sa mga tawong namuyo atubangan sa simbahan.

Hinoon, dili gihapon ikalimod nga anaa pa kining mga libud-suroy sa General Maxilom Avenue paingon na sa Fuente Osmeña ngadto na sa Barangay Capitol Site.

Matud ni Patalinghug nga gawas sa Cebu City, ang Mandaue City usab duna nay task force nga giumol aron pag-atiman sa mga libod-suroy nga kabataan sa maong dakbayan. (Jessa Agua/EIM)

Tindero’g balut gipatay

Gipatay ang usa ka negosyante og balut nga nanag-iya usab og karenderiya dihang gipusil kini sa wala pa hiilhing tawo didto sa Barangay Pajo, dakbayan sa Lapu-Lapu kagahapon sa buntag.

Ang kapolisan naghimo pa og imbestigasyon aron mahibaw-an kinsa ang duha ka tawo nga mipusil ni Raul Tortoga, 49-anyos nga taga Barangay Looc, dakbayan sa Lapu-Lapu.

Sigun sa mga saksi nga ang mga kriminal nagsul-ob og crash helmet mao nga lisud sila mailhan apan giingon nga pareho nga  kasarangan ra ang panglawas.

Si PO1 Anthony Piencenaves  sa homicide section sa Lapu-Lapu City Police Office (LLCPO) miingon nga ang pipila ka tawo nga nakasaksi sa maong hitabo mitug-an nga naglingkod lang ang biktima sulod sa iyang tindahan dihang miabot ang mga kriminal.

Matud ni PO1 Piencenaves nga ang nag-angkas nga lalaki maoy nanaug gikan sa motorsiklo ug giduol ang biktima nga nagtalikod paglingkod og dayong pusil sa bukobuko.

Human pusila ang biktima dali kini mibalik pagsakay sa nagpaabot nga motorsiklo ug mipabulhot pagpadagan palayo. Dali nga gihatod ang biktima sa Mactan Doctors Hospital sa Barangay Basak sa maong dakbayan apan gideklarar nga patay na’ng daan ang biktima sa pag-abot.

Si PO1 Piencenaves miingon nga ang pasiuna nga iyang nahibaw-an sa kasingkasing mitama ang bala ug milapos sa dughan nga maoy nakaingon sa diha-diha nga kamatayon.

Walay nakaplagan nga kabhang sa bala ang kapolisan dihang miresponde sila sa dapit nga nahitaboan. Nagpasabot nga adunay posibilidad nga revolver ang gigamit sa kriminal.

Matud ni Piencenaves nga mohimo pa sila og dugang imbestigasyon sa mga sakop sa pamilya aron pagsuta sa posible nga hinungdan ug pag-ila sa duha ka nagpusil sa biktima. (/RUB)(BANAT NEWS)