Mabdos nga ‘drug pusher’ dakpan
CEBU, Philippines - Nasikop sa kapolisan ang usa ka mabdos nga giingong drug pusher atul sa gipahigayong buy-bust operation didto sa Barangay T. Padilla kaniadtong Biyernes sa hapon.
Si Melinda Obsequias, 39, ug nagpuyo sa gitawag og Sitio Bahaw sa Barangay T. Padilla gisikop sa mga sakop sa City Anti Illegal Drugs Special Operations Task Group.
Matud sa kapolisan nga gidakop nila si Obsequias dihang mitunol siya og duha ka gagmay nga paketeng shabu ngadto sa poseur buyer bugti sa P200 nga marked money.
Human dakpa si Obsequias girekisa siya sa mga polis ug nasakmitan pa gayud og usa ka medium-sized nga pakete ug laing pito pa ka gagmay’ng pakete nga may sulod nga gitoohang shabu nga gibana-bana nga mokantidad og P21 mil.
Nakuha usab gikan sa suspek ang P720 nga kwarta nga gituohang halin niini sa iyang illegal nga negosyo.
Sa laing bahin, nasikop usab sa kapolisan sa dakbayan sa Toledo ang amahan ug anak nga gikatahong mga drug pusher atul gihapon sa buy bust operation nga gipahigayon didto sa Sitio Baybay 1 sa Barangay Poblacion Toledo pasado alas sayes sa gabii kaniadtong Biyernes.
Ang nadakpan mao sila si Eldie Pantallano, 45, nga matud sa kapolisan “level 2 drug pusher†sa maong dakbayan, ug ang anak niini nga si Wendy Pantallano, 21.
Nagtinabangay ang amahan ug anak pagbaligya og upat ka gagmay’ng pakete sa shabu ngadto sa poseur buyer sa kantidad nga P400. Ang hepe sa Toledo City Police Station nga si Chief Inspector Michael Anthony Bastes mao g’yuy nangunay pagpangulo sa buy-bust operation.
Dugang duha ka pakete nga shabu ang nakuha gikan ni Eldie Pantallano. Ang iyang anak nga si Wendy nakuhaan ‘sab og tulo ka paketeng shabu.
Ang mga dinakpan giandaman na og kasong paglapas sa Section 5 ug 11 sa Article 2 sa Republic Act 9165 kon Comprehensive Dangerous Drugs Act. (BANAT NEWS)
- Latest
