Korean, laing tulo missing

CEBU, Philippines - Upat ka tawo, apil ang usa ka Koreano, missing sa pagkalunod sa usa ka pump boat nga ilang gisakyan didto sa kadagatan sa tunga-tungang bahin sa Camotes ug Danao City tungod sa kadagku sa bawod kaniadtong Biyernes sa hapon.

Naluwas hinuon sa mga mananagat ang tulo ka Koreano nga sila si Kion No Ga, 55, Kyuogae Lee, 52, ug In Geol Ga, 27, samtang gipangita pa atol ning pagsulat sa balita si No Geol Ga, 25, ug ang tulo ka mga tripulante sa maong pump boat.

Matud pa nga mipugos og biyahi ang maong mga Koreano gikan sa Camotes padulong sa Danao tungod kay nag-apas sila sa ilang flight.

Ang commander sa Philippine Coast Guard-Cebu Station nga si Commander Rodulfo Villajuan miingon nga nagpadayon pa ang search and rescue operation sa maong Koreano ug sa tulo ka mga crew kansang pump boat way nakatug-an kun unsay pangalan.

Padayon usab ang search and rescue operation sa mga sakay sa usa ka motorbanca nga M/B Ave Maria nga nadugmok na sa baybayon sa lungsod sa Poro sa isla sa Camotes  nga nadiskubrehan sa mao gihapong adlaw, wa pay mahatag nga impormasyon si Villajuan kabahin sa mga sakay niini.

Gibanlas, gikusokuso

Mikabat ngadto sa 17 ka mga balay sa bukirang barangay sa Manipis, dakbayan sa Talisay ang nangaguba tungod sa bagyong Basyang niadtong Biyernes. Tulo niini totally damaged, sumala pa sa ilang City Disaster and Risk Management Council chief nga si Vincie Monterde.

Duna say usa ka balay nga gipanag-iya ni Antonio Abatayo sa sitio Ilang-ilang sa barangay Lagtang ang naguba human natumbahan sa punoan sa mahogany tungod sa kusog nga hangin.

Midahili usab ang yuta ug natabunan ang gipalapdang dalan sa barangay Manipis niadtong Biyernes sa gabii sa pag-abot ni Basyang. Si Lt. Jim Alagao, tigpamaba sa Central Command mibutyag nga duha ka balay ilawom sa taytayan sa Bago ang gibanlas, hinuon nakabiya na ang nagpuyo niini.

Apan kapin sa 20 ka balay ang nalubog sa baha sa sitio Buli, sa barangay Langub.

Samtang sa lungsod sa Tuburan, naguba ang pantalan  ug daghang mga balay ang nagusbat diha sa Barangay 6.

Walo ka flights usab ang gikanselar sa Mactan Cebu International Airport tungod sa dautang panahon niadtong Biyernes ug nibalik na kini kagahapon.

Matud pa sa RDRRMC nga gialerto nang daan ang mga local disaster councils aron malikay ang mga namuyo nga bantang kaayo sa peligro sama sa kabaybayonan, kilid sa mga sapa ug kabukiran. (Bryner Diaz ug Brenda D. Batuto/EIM) (BANAT NEWS)