Mga mamumuo miinsister og wage increase

CEBU, Philippines - Parehong mipaabot sa ilang mga sentimiyento ang habig sa mga negosyante ug labor sector sa bag-ohay lang nahuman kagahapon nga public hearing sa petisyon sa duha ka petitioners. Tataw kaayo nga walay giandam nga wage increase ang mga negosyante apan ang labor groups miinsister nga hustisya ang ilang gipangayo alang sa gipatulo nga singot sa mga mamumuo.

Si Chona Mantilla, chairman sa Regional Tripartite Wage and Productivity Board-7 mipasalig hinuon nga tanang gipresentar nga ebidensya ug argument sa duha ka habig ilahang tun-an og maayo aron makab-ot ang win-win solution.

Wa pay gitakda ang pito ka sakop sa board kun kanus-a sila magsugod sa deliberasyon.

Ang Associated Labor Unions-Trade Union Congress of the Philippines miingon nga mi-file sila og petisyon pagpausbaw sa suholan dili aron maalkanse, pasirad-an o ba kaha manaktak ang mga negosyante.

Matud pa nila nga buot lang nilang makabaton og desenteng kinabuhi ang mga mamumuo pinaagi sa saktong suholan.

Si Art Barrit, tigpamaba sa ALU-TUCP miingon nga dili  ‘lagpas’ o di sobra ang gipangayo nilang P90 nga minimum wage increase.

"This is a matter of justice for the workers and their families who are the ones who toil and create money for their employees," matud pang Barrit.

Samtang ang Living Wage Coalition, nga mipetisyon og P132 daily wage increase alang sa tibuok Central Visayas miingon nga misaka na tanan ang presyo ug mihinay na ang bili sa sweldo nga kasamtangang gidawat karon sa mga mamumuo. Ang National Economic Development Authority-7 ug ang Department of  Trade and Industry-7 mipresentar usab sa ilang sitwasyon karon sa ekonomiya sa rehiyon nga naglakip sa mga presyo sa basic ug prime commodities.

Matud pa nga misaka gyud ang ekonomiya sa rehiyon apan misaka usab ang inflation rate, misaka usab ang presyo sa mga palaliton gikan sa diyes sentimos ngadto sa kinse sentimos.

 Ang mga magpapatigayon miinsister nga dili pa panahon karon aron dugangan ang suhulan gumikan sa mga nangagubang patigayon dala sa duha ka kalamidad. Sila miapelar nga dunay ipatumang moratorium sa wage increase. (BANAT NEWS)