Sto. Niño sa Mactan nagmilagro

CEBU, Philippines - Gikagubtan  sa katawhan sa dakbayan sa Lapu-Lapu ang imahe sa Sr. Sto. Niño nga napalgan sa tulo ka mga bata  ug nagmilagro  nga nakigsulti kuno  kanila  didto  sa Sitio Sea Breeze, Brgy. Mactan  sa milabay’ng hapon.   Base sa nasayran sa Banat news ang tulo ka mga bata nga nakakita sa imahe ni Sr. Sto. Niño mao sila si Sharmil Arellano, 6, KG ace Arellano, 4, ug Neniel Balermo, 3, nga mga residente sa maong dapit.     

Matud pa ni Sharmil   nga  sa  ala 1:30 sa milabay’ng hapon samtang nanguha sila og basura sa daplin sa dagat sa maong dapit ilang nakita ang usa ka dulaan nga manika.      

May walo ka pulgada  ug  tunga ang  gitas-on  niini, nagkapa, nagsul-ob  og  kawo, nagtangkil  og  gamay nga  libro  ug  ila  kining  gitawag  nga Senior Santo Niño  nga laagan. Nasuta sa  mga  molupyo  nga suroyan  kuno  kining  Santoniñoha  kay bisan  isulod kini sa urna,  mogawas  gyud  apan  mobalik kuno  hinuon.      

Si Janeth Balermo, 41,  kinsa  maoy inahan  sa mga  bata  nga  nakakita  sa  maong  santos  nagkanayon  nga nakurat  ang iyang  mga anak  dihang  misulti  gyud  ang  imahe,  busa  ila kining  gisalibay.       Apan  gimandoan  kuno  sila  nga  ipadala  siya (Sto. Niño)  sa ilang  balay  hinungdan  nga  gipas-an  usab  dayon  kini  ni KG Ace paingon  sa ila.      

Si Ramil  Arellano, 28, nga  nagtrabaho  isip  sastre  sa MEPZA  ug amahan  sa duha  ka  bata  nga  nakapas-an  ni Sto,  Niño  miingon  nga iya  dayon  kining  gipatong  sa ilang  altar.       Matud pa  ni  Ramil  nga  ila  kini nga  gipabinditahan  sa  Mactan  Parish Church  aron  mosamot  kini  ka  gamhanan  sa  pag-ayo  labaw  pa  sa  mibindita  kaniya   ug  makaayo  sa  mga  masakiton  nga  tawo  nga  mobag-id  sa lawas  niini.      

Nasayud si  Ramil  nga  misikat si Sr. Sto. Niño  karon  nga  daghan  na  kaayo  ang  motan-aw  ug  mohikap  niini  aron  maulian  sa ilang  mga  sakit  ug  tanang  matang  sa problema.      

Si  Conrado Agosto, kanhi  konsehal  sa Mactan  nagkanayon  nga  iya  mismong  nasaksihan  ang  pagdugok  sa  mga tawo  nga  magdala  og  panyo  ug  jacket ug  uban  pang  ginamiton  nga  ipahid  sa lawas  sa Sto. Niño  dayon  ipahid  usab  sa ilang  lawas  ug  ang  tanang  masakiton  karon  naayo  na.      

Gisubay  sa  mga bata  ang  nahitabo  nga sa paggunit  ni  Sharmil   niini, kalit kining natagak ug nagkanayon "ayaw lang og kahadlok kay dili tamo unsaon”. Kumo  kay  bata mikaratil og dagan ang tulo  ug   nangayo og panabang  sa  mga  silingan  dayon  mibalik sila  sa maong dapit.     

Nakugang na lang ang mga bata nga ang ilang nakita usa na ka emahe sa green nga Sto. Niño ug dili na susama sa bata ang lawas nga ilang unang nakita.      

Gumikan niini ang mga residente sa maong dapit mipakatap dayon sa taho nga nagmilagro ang Sr. Sto. Niño ug gibuhatan dayon kini og payag nga temporaryong kapilya niini.       

Apan si Lapu-Lapu City Mayor Paz Radaza mipasidaan ngadto sa publiko nga dili dayon motuo sa maong  taho ug angay  una   nga ikonsulta kini  ngadto sa mga "religious persons" aron masuta kung unsay matuod.   Matud pa ni Mayor Radaza nga dili siya gusto nga abusohan sa mga residente sa maong dapit  ang  ilang  Dios. Kini ilabi na kung aduna nay kwartang malambigit  gikan  sa  mga parokyano alang sa maong imahe. (BANAT NEWS)