Suspek nga mipatay sa 5 anyos sikop

CEBU, Philippines - Nasikop sa kapolisan kagahapon pasado  alas 12:00  sa udto  ang suspetsado nga  mipusil patay sa 5-anyos nga bata  sulod sa balay sa apohan niini sa dakbayan sa Naga niadtong Sabado sa gabii.

 Ang suspetsado  mao  si Felix Alimento, 21, kinsa nasigpatan sa mga sakop sa Provincial Investigation and Detective Management Branch (PIDMB) ug sa Naga City police didto sa iyang balay sa barangay Taghaguimit.

Nagkanayon si Sr. Insp. Wilson Abot nga positibo nga giila  ni Prima  Cantome,  apohan sa namatay, ang suspetsado nga maoy mipusil sa biktima  sulod  sa  iyang balay.

Wala na makaikyas ang suspetsado dihang wala  na  kini  makalusot  sa usa ka dead-end nga dapit hinungdan nga nasikop kini sa kapolisan.

  Sumala pa ni Abot nga mikabat og usa ka oras ang ilang operasyon sa paggukod ug pagsikop sa biktima.

Didto na naabtan sa ulingan ang suspetsado apan naglisod ang kapolisan tungod kay bukid na kaayo ang maong lugar.

 Wala na ma-recover sa PIDMB ug sa kapolisan sa dakbayan sa Naga ang armas nga gigamit sa maong suspetsado sa pagpusil sa biktima.

 Matud pa nga upat ka mga tawo ang nakit-an sa biktima apan si Alimento pa lang ang posibli nga nailhan niya.

   Nakalas usab ang bana ni Cantome niadtong 2005 ug ang iyang anak niadtong 2004 tungod sa pagpamusil. (BANAT NEWS)