Lalis sa magtiayon nakapahikog sa bana

CEBU, Philippines - Patay na nga napalgan ang usa ka bana nga gikalalis  sa asawa ug naghikot og  pisi  sa  liog nga nagbitay  sulod sa  iyang  lawak  sa Sta. Catalina, Poblacion II sa dakbayan sa Carcar sa miaging  hapon.

Ang namatay naila nga si Rosel del Rosario, 34, molupyo sa sitio Dapdap, Poblacion III sa  maong dakbayan.

Sumala pa ni PO1 Francisco Saberon nga naabtan sa iyang anak nga lalaki ang namatay nga naglingkod sa lingkoranan nga nagbitay sa pisi busa dali kining mitawag og tabang.

Naabtan  sa kapolisan  nga naghigda na sa sawog ang namatay ug giputol na ang pisi nga gihigot sa  liog  niini.

Daling gihatud sa kapolisan  ang namatay  ngadto  sa Carcar Provincial Hospital aron matambalan apan gideklarar kini nga dead on arrival ni Dr. Alimar Nassae.

Sumala pa ni PO1 Saberon nga dili lang kini ang una nga higayon nga naghikog ang biktima.

Nasuta  usab  sa kapolisan  nga sa wala pa maghikog ang biktima giingong  nagkalalis kini ug ang iyang asawa.

Walay nakita nga foul play ang kapolisan sumala pa ni  PO1 Saberon ug ang pamilya sa namatay nakadawat na sa iyang kamatayon.  (BANAT NEWS)