Nagdala’g dinamita nadakpan

CEBU, Philippines - Nasikop sa mga sakop sa Cordova Marine Watch ang usa ka mananagat nga nakuhaan og duha ka botelya nga dinamita gidudahang naniro og dinamita sa Likoron sa lungsod sa Cordova sa alas 7:00 sa miaging buntag. Ang nasikop naila nga si Jereme Torreon, 33, taga Buagsong, Cordova.

Matud pa nga samtang nagptrolya ang mga sakop sa Cordova Marine Watch nga sila si Sesaldo Cabaocabao, Fredalie Tabial, Ryan Sultan, ug si Ernesto Osias, ilang nabantayan nga dunay mga isda nga nanglutaw duol sa parola sa Likoron. Pipila ka metros gikan sa maong lugar ilang nasigpatan ang usa ka pumpboat nga giluwanan ni Torreon maong ila kining giduol ug diha nila nakita nga duna kini duha ka botelyang dinamita ug nagkalain-laing matang sa isda nga gituohang nakuha pinaagi sa maong illegal nga panagat.

Ang suspetsado gidala ngadto sa Cordova Police Station ug kasamtangang natanggong karon samtang giandam pa ang kaso nga kalapasan sa Section 88 sa RA 8550 o Fishing Through Explosives, Noxious or Poisonous Substance, and/or Electricity. (BANAT NEWS)