CEBU, Philippines - Gipusil patay ang usa ka drug user ug kawatan sa wa pa mailhi nga suspetsado sa sitio Tanke II, Alaska barangay Mambaling dakbayan sa Sugbo alas 3:00 sa kaadlawon kagahapong adlawa.
Ang biktima naila nga si Gerald Agas, 24, molupyo sa sitio Pagatpat, Alaska barangay Mambaling sa maong dakbayan.
Basi sa imbestigasyon nga gihimo nila ni PO3 Geoffrey Gutual, PO1 Michael Angelo Singson, PO1 Joel Zamora sa Homicide Section ug sa CSIU nga gipangunahan ni SPO3 Rene Ramos sa Cebu City Police Office, nga ang biktima naghigda na nga wala nay kinabuhi ug aduna’y duha ka samad-pinusilan sa walang kamot ug usa sa dughan niini nga maoy posibleng rason sa dali niyang kamatayon.
Si Arman Maranga, 21, higala sa biktima miasoy ngadto sa kapolisan nga gikan sila nag-inom kuyog ang biktima ug uban pa nilang higala.
Sumala pa ni Maranga nga padulong siya sa tindahan aron mopalit og sigarilyo ug misunod ang biktima ug ang higala niini nga sila Gildo Carza ug Richard Maranga.
Sa dihang miabot ang suspetsado nga nagdala og armas, sa way pagduha-duha gipusil sa makaduha ang biktima ug mikaratil og dagan palayo ang mga higala niini aron dili maangol.
Misuway pa og dagan ang biktima apan pipila ka metros nahagba ra usab kini tungod sa samad-pinusilan nga naangkon niini.
Si PO1 Michael Angelo Singson sa Homicide Section sa Cebu City Police Office nga nahinabi sa Banat News, nagkanayon posibleng aduna kini’y nakaaway ang biktima kay tungod kawatan sab nga pagkatawo o aduna ba’y nagdumot niini.
Nagpadayon gihapon ang imbestigasyon sa kapolisan sa maong panghitabo ug pagpangita sa maong suspetsado. (BANAT NEWS)